الرئيسية بشرة وشعر بشرتك بهتانة ومطفية وحالها مدهور

بشرتك بهتانة ومطفية وحالها مدهور

بشرتك بهتانة ومطفية وحالها مدهور

لو بشرتك تعبانه / بهتانة / مطفية / مسمرة  / مغمقة من الشمس
وعندك مناسبة سعيدة ونفسك تفتحيها ف اقرب وقت
متقلقيش اليكِ الحل باذن الله في 3 خطوات
بشرتكم هترجع فاتحة ومشرقة لا حبوب ولا غمقان ولا هالات ..وذالك في في ثلاث خطوات

الخطوة الاولى
ماسك التفتيح المجرب

ماسك مجرب ومضمون ونتايجه سريعه
اسميته ماسك الانقاذ
للمهتمين يفتحو بشرتهم ف اقل وقت
كنت بستخدمه كتير زماان وكانت بشرتي ديما فاتحة ومبيضة على غير العادة
وكانو البنات قرايبي بيتجننو يعرفو مني اسم الكريم
اللى فتح بشرتي
احلفلهم بايه انى مش بستخدم اى كريمات
وانه مجرد ماسك بسيط بستخدمه باستمرار
وجربوه وفرحو بنتايجه جدا
وناس استمرت عليه وناس كسلت وبطلت
بس اللى استمرو… ماشاء الله على بشرتهم زي الفل
مهما خرجو ف الشمس مش بيسمرو ولا حتى بيستخدمو واقي

لكن عن نفسي انا بطلته لانى مكتفية بصابونة التفيتح ايضا
نتايجها مذهلة مع الاستمرار بتعالج الحبوب والبقع واى مشكلة بالجلد
بإذن الله هبقى انزلكم طريقة عمل الصابونة ف موضوع اخر
بس هي محتاجة وقت عشان تبان نتايجها
لكن الناس اللي بشرتهم اغمقت من الشمس
وعندهم مناسبات قريبة
ووقتهم ضيق…محتاجين لحاجة سريعه وعمليه
يبقى ماسك الانقاذ هو الحل المناسب لهم
كفاية رغي بقا يافوءة ارحميينا …المناسبة هتيجي وتعدي وانتي بتتكلمي.هههه
فين المااااسك ؟؟
من عنييا …اتفضلوا

اليكم
ماسك الانقاذ للتفتيح السريع لبشرة جديدة.. ولكل مناسبة سعيدة
مكونات الماسك…………………..

نصف ثمرة بطاطس مسلوقة جيدا

معلقة عسل نحل

معلقه زبادي او لبن رايب

قرص اسبرين

نقطتين ليمون

صديقنا الليمون باشا
كلناعارفين فوايده للبشرة وبنستخدمه كتير
بس فين ناس بتتساهل جدا ف استخدامه بوضعه مباشرة ع االبشرة دون تخفيف
في ناس بتتحمله ….لكن معظم البشرات بتبقى حساسة مينفعش استخدامه بدون تخفيف
علشان ميسببش نتيجة عكسية
لو عندك بقعه ناتجة عن التهاب الليمون لوحده ممكن يزودهاا
ولو استخدمتيه بعدها تعرضتى للشمس يسبب الاسمرار
فلازم تستخدموه بحذر شديد مع التخفيف

الطريقة
نضع قرص الاسبرين بكمية الزبادي
لحد ما يدوب الاسبرين تماما فيه …بعد كدا نخلط باقي المكونات يدويا او بالخلاط

ودة الشكل النهائي

الاستخدام

بتفرديه على وشك وحول العين منطقة الهالات ,,,,,,,,
,,,ومنطقة الرقبة مهمة جدا متنسوهاش
تتركيه من 15 :20 دقيقة لحد ما تحسي ان وشك شد شوية والماسك بدء ينشف
تبلي البشرة بقطرات ماء وتزيلي الماسك بفرك خفيف …
وممكن تستعيني بقطنة او فوطة قطن مبلله
اوعي تفركي الماسك وهو ناشف ,يسببلك تجاعيد
لازم البشرة تكون مندية والماسك طري
بعد شطف الوجه من الماسك بتمسحي بقطنة مبلله بمية الورد
لغلق المسام

ما هي النتيجة باذن الله.؟؟
1- تفتيح البشرة بدرجة كبيرة وازلالة البقع والهالات والسواد حول الفم
نظرا لوجود البطاطس
غنية بفتامين سي ومجموعه اخرى من الفيتامينات المفتحة والمقاومة للبقع والمجددة لخلايا البشرة
وايضا الليمون والعسل
بيعملو تقشير خفيف للبشرة لازاله الطبقة السطحية الغامقة واحلال طبقة جديدة مكانها

2- ازاله الحبوب والرءوس السوداء
العسل والليمون بيقامو حب الشباب وبيزيلو الروؤس السودا
لانهم بيطهرو المسام من البكتريا المسببة للحبوب
وايضا البطاطس تحتوى على مجموعه من الاحماض المقاومة للحبوب
ومننساش
الاسبرين
دة سر الماسك
قرص الاسبرين الصغير دة له مفعول قوي مش بس للصداع…. لاء
ولكن لمقاومة الحبوب وازالتها وتنقية البشرة لاحتوائه على حمض مهم جدا\
حمض السالسليك
صديق البشرة
كلنا عارفينه اهميته
مقشر ومفتح ومطهر للمسام ومجدد للخلايا
وبيدخل في صناعة اهم كريمات التفتيح والتقشير
واشهرها
الديبروساليك

3-ترطيب البشرة
دة دور الزبادي او اللبن الرايب علشان الماسك يبقى طري وحنيين ع البشرة
فميشدهاش قوي ويجعدها بعد كدا
كمان حمض اللاكتيك بالالبان يعتبر مقشر خفيف ومجدد للخلايا فبيساعد ع تفتيح اكثر

الاستخدام
للمناسبات القريبة .خطوبة زواج .حفل راس السنة اللى ع الابواب
كل سنة وانتو طيبيين
يفضل تستخدميه يوم بعد يوم
علشان تقدري توصلي لاقصى درجة من التفتيح ف اسرع وقت
اما الاستخدام العادي المستمر
مرتين ف الاسبوع كفايه
للحفاظ على نضارة البشرة وتفتيحها باذن الله

ندخل ع الخطوة التانيه

كريم الترطيب والتغذية والتفتيح

اى كريم مرطب عندك هتضيفي له
بعض الاضافات التى تزيد من قيمته وفائدته للبشرة

مثلا كريم الاطفال” اوليفز زنك”

بتاخدي كمية متوسطة وبتضيفي عليها زيوت مرطبة
ومفتحة
ومضادة للتجاعيد
معلقة صغيرة من كل زيت
(خروع-زيت فe – جلسرين – جنيين القمح-زيتون)
اواي زيوت مناسبة لبشرتك
وممكن تكتفي بجنيين القمح وزيت الزيتون

لو هترطبي بزيوت دون الكريم…..
…كوني حريصة انك تستخدمي قطرات قليلة جدا
الزيوت مش زي الكريمات ..
مش بتمتص بسهولة فمتكرتيش من الزيت
علشان البشرة تتشربها بطريقة
افضل

يستخدم بعد الماسك
للترطيب والتغذية
ويفضل تعملي الماسك ليلا علشان تتركي الكريم ع بشرتك طول الليل لنتيجة
افضل باذن الله

الخطوة التالته

تونر لبان الدكر

بتجيبي كمية من لبان الدكر وتنقعيهم بمية ورد مغليه
مضاف لها معلقة زيت زيتون مع الغليان
وبعد الذوبان التام للبان .. بتحفظيه بزجاجة سبراي
فايدة الزيت
ان التونر مينشفش الوجه
فالزيت هيعمل على ترطيبه وحمايته من الجفاف

معروف لبان الدكر بفوايده الكبيرة للبشرة
فهو مضاد للاكسدة ومفتح ومجدد للخلايا
ومنقي للبشرة ومزيل للهالات والحبوب
الاستخدام
تقدري تحطيه ع بشرتك ف اي وقت واى عدد من المرات ,,مفيش منه اي مشاكل
مهما كان نوع بشرتك هفيدك جدا باذن الله

يارب الموضوع يكون عجبكم واستفدتم منه ,,,
,,,,,,وكل سنة وانتم طيبيين وسنة جديدة سعيدة عليكم اجمعين
والي لقاء جديد
مع موضوع جديد وفريد..ومفيد ,,,,باذن الله
من موضوعات العناية ببشرتكم ..
لاختكم فوءة,,,,,,,
سلاااااام بالسلامة

تقييم المستخدمون: 4.65 ( 1 أصوات)

عن بوسي رأفت

رايك يهمنا ♥

error: