برغم اننا في خصام | بقلم أحمد عطوه

برغم اننا في خصام
وكل كلامنا لوم وملام
عتاب مكسور في شكل ركام
وده صابر .. وده عشمان
فنغلب روحنا للحرمان
ماننطق بنا دلع في كلام
وشوقنا الينا يبان سرحان
لكنه بحق .. يموت ويبان

برغم اننا في خصام
بتابع كل خطاويها
وبتلكك ..
وقال يعني في شئ يدايقها
في السكة
فبجري عليها وارضيها
كأني حميها حراميها

برغم اننا في خصام
فكل سكوت يطول بهيام
وتسرح بيا ذكري ليوم ..
كان امبارح
تعيش الدور وبتقاوح
تقول جواك .. انا مظلوم
تقول ..لأ .. انا جارح

برغم اننا في خصام
وبنا سكوت يبان غالب
لكن جوانا ثورات ..
لشوقنا لبعض كان هارب
لغنوة في يوم نغنيها ..
لضحكة في علو حكاوينا
لكلمة حب ترضينا
لكام فيلم فى السهرة
وكام ضحكه مش ظاهرة

برغم اننا في خصام
فنستنى يكون بنا طرف تالت
عشان نتنازل عن الكرامات
ونرجع يومها نتصالح ..
كأن زعلنا .. عتاب الخوات

#عطوه

error: